Bantay Radyo

DAKONG isyu karon dili lang sa Sugbo kundi sa tibuok nasud ang reclamation project sa Consolacion kay gawas sa dili mominus sa 2 mil ka nga trabahante sa shipyard ang mawad-an og trabaho, dakong baha ang gikahadlukan nga moresulta tungod niini. Niadtong Hulyo gimandoan na ni Judge Allan Francisco Garciano sa Mandaue City Regional Trial Court 83 si Mayor Joannes Alegado nga dili ipasira ang mga shipyard sa Consolacion samtang aduna pay kaso bahin niini. Ang order ni Judge Garciano epektibo hangtud Disyembre ning tuiga, apan gipadayun pa gihapon ni Mayor Alegado ang pagpa-survey sa yuta sa Tayud diin 235 ka ektarya sa dagat ug baybayon niini ang tabunan o i-reclaim para himuong Seafront City. Tiaw mo na pwerteng kadako sa maong dagat sa Consolacion ang mawa tungod sa maong ambisyusong proyekto sa mga Alegado. Pila man sad kaha ka pamilya ang magutman kay mawad-an og panginabuhian sa kadagatan? Matud pa ni Bise Mayor Nene Alegado wala na kunoy mangisdaay sa Consolacion. Kadakong binuang. ...

GIMANDOAN ni Judge Allan Francisco Garciano sa Mandaue City Regional Trial Court 83 si Mayor Joannes Alegado nga dili ipasira ang mga shipyard sa Consolacion samtang aduna pay kaso bahin niini. Giluwatan ni Judge Garciano ang status quo ante order niadtong Hulyo nga epektibo hangtud Desyembre 31 ning tuiga. Ang desisyon sa huwis makahatag og temporaryong kalipay sa mga dos mil ka mga trabahante sa mga shipyard sa Barangay Tayud sa Consolacion nga namiligro nga mawad-an og trabaho tungod sa plano nga Seafront City kun reclamation project nga motabon sa 235.80 ka ektarya sa kadagatan sa maong barangay. Lakip sa mahawan ang mga shipyard sa maong dapit diin liboan ka mga trabahante ang maapektohan hinungdan nga nagsige ang ilang protesta batok sa proyekto ni Alegado. Matud pa sa mga trabahante, pandemya pa, ang nagbuhi na lang nila ug sa ilang mga pamilya ang mga shipyard sa Tayud; ug kung kini mawala pa, magutman gyud sila.  - Vatski