KONTROBERSYAL NGA RECLAMATION SA LACION

DAKONG isyu karon dili lang sa Sugbo kundi sa tibuok nasud ang reclamation project sa Consolacion kay gawas sa dili mominus sa 2 mil ka nga trabahante sa shipyard ang mawad-an og trabaho, dakong baha ang gikahadlukan nga moresulta tungod niini.

Niadtong Hulyo gimandoan na ni Judge Allan Francisco Garciano sa Mandaue City Regional Trial Court 83 si Mayor Joannes Alegado nga dili ipasira ang mga shipyard sa Consolacion samtang aduna pay kaso bahin niini. Ang order ni Judge Garciano epektibo hangtud Disyembre ning tuiga, apan gipadayun pa gihapon ni Mayor Alegado ang pagpa-survey sa yuta sa Tayud diin 235 ka ektarya sa dagat ug baybayon niini ang tabunan o i-reclaim para himuong Seafront City. Tiaw mo na pwerteng kadako sa maong dagat sa Consolacion ang mawa tungod sa maong ambisyusong proyekto sa mga Alegado. Pila man sad kaha ka pamilya ang magutman kay mawad-an og panginabuhian sa kadagatan? Matud pa ni Bise Mayor Nene Alegado wala na kunoy mangisdaay sa Consolacion. Kadakong binuang. Unsa na diay na ang Consolacion, Makati City? Magkatawa nga maghilak ang mga makadungog nga mangisdaay sa gipamulong sa ilang bise mayor. 

Baha sa Tayud

Ang maong proyekto gipanguluhan sa La Consolacion Seafront Development nga taga Luzon ug aduna lay capital nga P10 million. Samtang ang reclamation project mokaon og bilyones ka pesos. Sounds familiar no? Murag Pharmally Corporation lang nga P600,000 ra ang capital pero gihatagan sa gobyerno og bilyones nga kontrata. Ang resulta pwerte nang datua sa mga nagpaluyo sa Pharmally, ug wala sab ta kahibalo kung pilay kickback sa mga nagpasud niini. Mao sad ni sa sitwasyon ron sa Consolacion. Nganung ipamugos man gyud sa mga Alegado ang reclamation project nga dili mominus sa dos mil ka mga trabahante ug pila ka gatus ka mga mangisdaay ang mawad-an og panginabuhian tungod niini. Lakip pa ang ilang mga pamilya ang magutman. Kana ug ang dakong kadaut sa kalikupan sa maong dapit ug baha tungod kay masira naman ang agianan sa tubig. Bahaon na gani ang Tayud ron nga wala pay reclamation, samot na kung naa na. Kung nakaagi mo sa South Road Properties sa dakbayan sa Sugbo, kada kusog nga bunok sa uwan, matic bahaon sab na diha bisag sa tunga sa karsada. Aduna pa ganiy portion sa SRP mismo nga maglutaw sa tubig kada uwan. Modern na gani nang SRP unsa nalang ning Seafront City.

Ganahan tag development kay kuyog ana ang dugang buhis ug trabaho sa katawhan. Apan kung mas dako pa man gani ang epekto niini kaysa benepisyo nganung ipamugos pa man gyud? Hilabi na karon nga pandemiya, daghan pang angayng hatagan og atensyon ang lungsod kaysa aning reclamation nga ang mga bulsa ra sa pulitiko ug mga negosyante ang mabusog.

Sponsored by Lacto Pafi