2 patay sa ambush sa Samar

USA ka pulis ug usa ka sibilyan ang namatay sa ambush sa Barangay Libuton, Borongan City, Eastern Samar pasado alas 3 sa hapon sa Biernes.

Laing upat ka pulis ang grabeng nasamdan uban ang 9 ka sibilyan lakip na ang 2 ka bata ug usa ka anyos nga masuso.

Ang biktima giila sa kapulisan nga si Patrolman Mark Jerome Rama, samtang ang pangalan sa babaye’ng napatay wala pa gibutyag.

Matud pa sa report, ang mga pulis sa 1st Eastern Samar PMFC sakay sa usa ka Hilux Patrol Car padung sa Eastern Samar Police Provincial Office sa dihang gibanhigan sila. Base sa inisyal nga imbestigasyon, nagbyahe ang maong sakyanan sa mga pulis sa highway sa Barangay Libuton, kalit lang naay mibuto nga bomba ug gisundan kini og sunod-sunok nga rakrak sa armas gikan sa mga gituhuang miembro sa New People's Army.

Naangin sa maong ambush ang usa ka multicab nga adunay lulan nga mga pasahero nga sibilyan ug mga estudyante. Usa sa mga pasahero nga babaye ang naangin ug namatay sa maong pagpamanhig.