41 na ang patay, dul-an 1,300 ang nasakit sa coronavirus

MIKABAT na sa 41 ang namatay samtang misaka sa 1,300 ang naigo sa bag-ong coronavirus sa China, matud pa sa mga otoridad.

Ang bag-ong mga biktima taga Wuhan, ang ground zero sa maong virus, diin aduna kiniy 11 million ka mga residente. 

Matud pa sa National Health Commission, dili mominus sa 444 ka mga bag-ong kaso ang natala hinungdan nga miabot na ang record sa mga biktima dul-an 1,300.

Ang maong sakit mikatap na sa 30 ka mga probinsya sa China. 

Ang Wuhan ug laing 13 ka mga syudad sa China gisirad-an na para ma-quarantine o mapugngan ang pagkatap sa maong virus, nga makuha ra usab sa mga tawo nga apektado niini. 

Mando sa Department of Health, para malikayan ang sakit, kinahanglan maglikay sa daghang tawo kay posible naa diha ang nagdala sa sakit, magsul-ob og mask kung dili mapugngang mogawas, moinum og daghang tubig, vitamin C ug probiotic drink, ug manglimpyo sa lawas kanunay. Wala nay kaso sa coronavirus sa Pilipinas human ang 5 anyos nga bata nga gikan sa Wuhan nga niari sa nasud kuyog ang iyang pamilya, nagnegatibo na sa maong sakit base sa resulta sa test didto sa Australia.