P70.5B nga buhis ang nabayad sa ABS-CBN sulod sa 17 ka tuig

SOBRA sa P70.5 ka bilyones nga buhis ang nabayad sa ABS-CBN sa gobyerno sulod sa 17 ka tuig niini nga operasyon, matud pa sa opisyal nga statement sa network.

"Ang ABS-CBN ay isa sa mga pinakamalaking taxpayer sa bansa, sa nakalipas na 17 taon, umabot na sa P70.5 bilyon ang binayarang buhis ng ABS-CBN sa gobyerno," matud pa sa network.

Ang maong pamahayag giluwat taliwala sa alegasyon nga ang maong istasyon utangan sa gobyerno. Apan matud pa sa ABS-CBN, gihatagan na sila og certification sa Court of Tax Appeals human gibayran nila ang ilang buhis sa miaging tuig. Ang maong certification nagpamatuod nga walay utang ang maong network sa Bureau of Internal Revenue (BIR).

"Ipinagmamalaki ng ABS-CBN ang pamamalakad ng organisasyon nang may buong katapatan at integridad. Walang utang na hindi nababayaran ang ABS-CBN sa anumang bangko," dungag pa sa maong istasyon.

Ang prangkisa sa ABS-CBN mapupos na sa Marso 30, 2020 ug aduna nay naduso sa Kongreso nga 10 ka nga balaudnon nga naglaraw nga magdungag og laing 25 anyos nga prangkisa sa maong istasyon. Marso 11 na lang kutob ang Kongreso sa dili pa kini mag-break, ug kasamtangang wala pa ma-calendar ang mga balaudnon nga pabor sa pag-renew sa prangkisa sa maong istasyon. Apan matud pa ni Speaker Alan Cayetano, matuki ra nila kining mga balaudnon kung dili na init ang ulo sa mga tawo. Dungag pa ni Cayetano, walay ikabalaka ang publiko kung dili nila matuki ang mga renewal sa prangkisa sa ABS-CBN kay og mapaso na ang kasamtanang prangkisa niini, magpadayon pa gihapon kini sa ilang operasyon.