Nagpositibo sa Zapatera 20 ka adlaw pa una gipahibawo

Residente gustong paimbestigahan ang swab testing

USA ka residente sa Sito Zapatera, Bo. Luz, Cebu City miawhag sa dakbayan sa Cebu nga paimbestigahan ang swab testing sa ilang sitio.

Kini human sa mga giingung daghang anomaliya sa pag-swab test sa mga residente sa maong sitio, ang giingung epicenter sa Covid-19 sa Sugbo.

“Akong gusto mahitabo nga imbestigahan na ang nag-conduct og swab testing namu dri. First issue sa dili pag-ilis og gloves. Second, nganu wala mi ma-inform nga nag positive mi niabot pag 20 ka adlaw usa mi kahibaw,” matud pa ni Sarah (dili tinuod nga ngalan) sa pakighinabi sa Bantay Radyo Cebu.

Matud pa ni Sarah, Abril 15 pa silang gipaubos sa swab test, apan milabay pa ang 20 ka adlaw una siya gipahibalo nga nagpositibo diay siya sa coronavirus. Matud pa niya, dili lang siya ang nagpositibo sa maong sakit, lakip na ang iyang mga silingan.

Sulod sa 20 ka adlaw, tungod kay asymptomatic (walay sintomas sa sakit) si Sarah, matud pa niya nagpadayun ra ang iyang kinabuhi sulod sa panimalay uban ang 17 pa nga mga tawo sulod niini.

“Ako concern is April 15 nag swab mi May 5 mi nahibaw sa result. Di ba taas ra kaayu sa akong pagkahibaw 3 to 4 days ra na ang results. Ang akong lang nganu wala sila nipahibaw dayun para sa mag-isolate ko. Delikado man kaha ni nga virus. Ibutang ta lang ang virus ni resist sa akong lawas, I mean wala kaduot ang virus, unsay assurance nako nga sa mga sakop nako dri sa balay dili matakdan?” pangutana pa ni Sarah.

Dungag pa niya nga adunay silay silingan nga giingong nagpositibo pud sa maong sakit apan wala kini gi-swab test.

Niya pa, mahadlok na hinuon sila magpa-swab test og usab human sa walay klaro nga pamaagi sa mga naghimo niini.

“Pag swabbing namo nagbutang mi number para tawagan mi sa result wala ko kadawat og tawag. Pero ni-insist gyud sila nga gitawagan daw i-decline or i-reject daw namu. Wait lang kami nga pamilta usa mi sa nag volunteer nga magpa swab nganu mo decline or reject mn mi sa ilang tawag para result maypa wala nlng mi mag volunteer kay mahadlok mn diay mi sa result,” matud pa niya.

Nipasangil si Sarah na ang naghimo sa swab test walay ID nga unta magpahibalo nila kung si kinsa ni sila o taga asa nga ahensiya.

Matud pa ni Sarah, wala ra silay problema sa ilang mga kinahanglanon tungod kay daghang mga hinabang ang naabot kanila gikan sa mga indibidwal, gobyerno ug mga pribadong grupo. Apan niya pa, kung walay tabang gikan sa gawas, maglisud gyud sila sa ilang matag adlaw nga konsumo.

Ang iyang problema, matud pa, ang pagpa-swab test og usab tungod sa walay klarong proceso.

Human siya gitawagan sa Barangay Health Worker nga nagpositibo siya, matud pa ni Sarah, walay gihimong aksyon ang gobyerno.

“Wala ra. As in wala. Ako rang kagustohan mag-isolate ko diri sa balay bisan kabaw ko nga useless na,” matud pa niya.

Niya pa, “okay” ra silang taga Sitio Zapatera, ug “mura na gani og padung na balik sa normal kay mura naman wala credibility na ilang gbuhat murag nagduwa-duwa lang.”

Dungag pa niya duolon ra sila sa taga DOH ug LGU kung mag-swab test, ug sa una, para magkuha sa mga nagpositibo sa coronavirus.

“Akong msg is transparency lang. Palihug unya responsibilidad ninyo nga i-inform ang mga positive dili kay nag-message relay mo sa result. Unya tarunga pud tawn mi diri kay dili tanan nagpuyo sa among lugar ignorante. Tabangan mo namu kung tarungon mi ninyo og tabang,” matud pa ni Sarah.

Sobra sa 1,000 na ang nataptan sa coronavirus sa Cebu City, base sa data niadtong May 5, 192 niini taga Siito Zapatera.

Sa laing bahin, nangayo og komento ang Bantay Radyo Cebu sa dakbayan sa Sugbo, apan sa pagsuwat aning balita, wala pa mohatag og tubag ang nahingtungdan. / LGC