Adunay kay butang wala magamit, ipa-barter na na!

by VATSKI

[OPINION] SA karaang panahon ang mga yuta pailisan lang og sundang o usa ka bakid nga bugas. Kiniy gitawag og barter. 

Sa dihang nisaka na ang balor sa yuta, dili na pwede ang sundang, kwarta na gyud, minilyon pa gani. Apan sa panahon nga quarantine diin kargado sa katawhan anaa lang sa mga panimalay, sarado ang mga tindahan, kalit mibalik ang pagpa-barter. 

Sa Sugbo anaa ang Cebu Barter Community diin hapit na moabot og 200,000 ang mga followers. Anaa pud ang Barter Ta Bai ug ang mga barter communities sa mga lungsod. 

Adunay mga butang sama sa mahalon nga bag nga pailisan og cellphone. Aduna puy mga Rolex nga relo nga pailisan og condominium. Makita nimo nga daghan ang gustong pailisan ang ilang mga mahalon nga butang sa mga butang nga mas minus ra ang presyo, aduna puy uban nga gustong parehas ra ang kantidad sa butang nga ilang gustong ipa-barter. Sagol-sagol ang trip sa mga magpa-barter aning mga grupoha.

Og samtang daghang nalingaw sa mga isla ug Hermes bag nga gipagawas para ilisan og laing mga mahalon nga mga gamit, daghan usab ang mga andam motabang hilabi na kadtong mga netizen nga magpailis sa ilang ginamit nga sapatos og de lata para makaon sa ilang pamilya. Aduna puy uban nga magpa-barter og mga utanon para sa cellphone nga magamit sa ilang anak inig sugod na sa online class puhon. Alegre nga makalipay magtan-aw nga buhi pa gyud diay ang kinaraan diin aduna pay balor ang sundang.

Sa mga adunay mga gilawa-lawa na nga mga gamit diha, pwede na na ninyung pailisan og mga butang nga magamit pa. Libre ra ang mga barter community.