[OPINYON] COVID KILLS

HAPIT na ta usa ka tuig aning atong pagpakigbisug sa #COVID19 pero nagkadugay murag wa gihapoy nakat-on atong mga lider diris Cebu. 

Si Gobernador Gwen Garcia nasuko nganong magsige og sibya ang media sa statistics sa COVID-19 nga sa kadaghang sakit sa probinsya, nganung ang attention tua man aning sakita nga maayo ra man ang mataptan niini. Niingun pud ni siya nga dili lumba ang pagpalit og bakuna batok sa COVID, nga gisegundaan pud ni Mayor Edgar Labella sa Cebu City. 

Base sa datus sa DOH-7 gahapon (Enero 27), ang probinsya aduna nay 580 ka mga aktibong kaso sa maong sakit; samtang ang Cebu City adunay 1,051. 

Ang giingung number ni Gob. Gwen gikan ra usab sa DOH-7, nga igo ra sab gibalita sa media. Importante pud nga makahibaw ang publiko unsa nay sitwasyon sa tibuok Sugbo lakip na ang Cebu City para maglikay sila. 

Unta no, imbes nga masuko, pangitaan na lang og paagi unsaon pagpaubos sa mga kaso kay pareha man tingali tang tanan og tumong - mawa na ning virus. Og kahibaw man tingali ning atong mga lider nganong nisaka na sab ni, pero dili na nila tugtan og balik nga mag-lockdown kay matud pang Mayor Labella masuko ang mga negosyante. Kung buot huna-hunaon ang pagpangabli sa mga negosyo ug turismo maoy posibleng usa sa mga hinungdan nganong nisaka og balik atong kaso. Tinuod, kinahanglang tabangan ang business ug tourism sector para makabalik og trabaho ang katawhan, padayun ang mga buhis ug dili mabangkarote og samot ang mga kapitalista. Pero sila nalang ba diay atong paminawon? Mabuhi tuod ning mga negosyo, mabalik ang turismo pero balik man sad tas uno.

Imbes unta magyawyaw ta, lingkuran ni nato atong giatubang ron, timbangon ang tanan, dili kay siguruon lang nato ang mga negosyante abi kay sila may lifeblood sa probinsya ug syudad. Unsaon man na nimo ilang buhis kung nangamtaay na ang katawhan.

Makaingun sab ta, ganahan ba kaha ni atong mga lider nga mahuman na ning pag-antos nato ron, no? Or mas ganahan silang malugwayan pa. Kay murag wa sila mangusog, gani motuboy pas mentalidad nga dili tinuod ang COVID kay gipangwartahan ra kinis Philhealth. Although aduna pud nay kamatuoran, pero og di tinuod ang COVID, katong mga gipanglubong ug gidauban na, joke ra diay to? Og mobasa tas comment section sa mga balita, ang pagdayeg sa mga tawo aning atong mga lider nga murag kevz ra sa COVID, makahilak ta. Kanang ingun ana nga mentalidad mao nay hinungdan nga dili na mosunod ang mga tawo sa social distancing, dili na magsul-ob sa ilang mask ug manggawas na. Numero ra gud ning COVID matud pas mga lider, nganong mahadlok man?

Mao nang dili ta kabasul sa mga tawo nganong gara na kaayo ron sa gawas. Ang gibuhat nato since last year naway pulos. Ang mga nangamatay nga mga healthcare people nawalay bili. 

Kay og seryuso ang atong mga lider aning COVID, no, namalit na ni silag bakuna dili kay moingun, unsa ni lumba? Matud pang Mayor Labella, haste makes waste. Or basin nabakunahan na ni sila maong wa gadali. Pero kita?

Kung mahinumdum mo last year, sa dihang giablihan ang border sa Cebu City ug Talisay atong June (first GCQ sa Cebu City), nisutoy ang saka sa kaso sa probinsya. Sa Talisay misutoy ang saka sa kaso. Nibalik sab og ECQ ang Cebu City atong panahona mao tong gipasira og balik ni Gob. Gwen ang border ug wala na gyud ablihi hangtud nag-MGCQ ang tibuok isla. 

Abtik kaayo ang gobernadora atong panahona bisag tuo kaayo siya sa tuob, pero og aksyon lang, way makalupig niya. Pero ambot naunsa na ni, nayabag na. COVID atong kontra dili ang media ug dili ang mga healthcare workers. Science ra pud ang makapildi aning sakita dili ang mga chismis. 

Pait pamalandungon nga natunga na sab ta, nga unta usa ra man ang atong tumong - ang mapildi ning animal nga virus. Balik tas uno. Kinsay alkanse? Kitang mga pobre. - VATSKI