BILL SA KURYENTE NIABOT OG P500K

NIREKLAMO ang mga konsumidor sa kuryente sa Visayan Electric Company (VECO) tungod sa kadakong pagsaka sa ilang bill sa kuryente sa mga milabay nga mga buwan gani usa kanila adunay sobra sa P500,000 nga bayranan sa maong buhatan.

“Attention VECO: Wala mo ma konsensya. Midangop diri kanato aron mangayo og tabang ang taga Ponce 1, Barangay Carreta. Dili nila makaya og data-datahan ang ilang bayrunon sa Veco tungod sa kadako na niini,” matud pa ni Edward Ligas, usa ka magsisibya.

Si Ligas mireklamo usab sa VECO sa miaging tuig tungod sa dagkong bill sa iyang kuryente panahon sa pandemiya.

 

Ang mga mireklamo ang mosunod:

1. Josephine Sotelliza P546,718.73

2. Letecia Suyko P343,386.32

3. Remedios Naces P184,054.82

4. Manuelito Salinas P88,864.78

5. Nadelyn Montegrande P64,646.80

6. Diego Rabacal P58,261.42

Matud pa ni Ligas gitugutan tuod ni sila nga mag-datadata sa ilang bayranan, apan matud pa nila, mas maayo pang mangutang sa Turko kay aduna pay katapusan kumpara sa VECO nga murag maniguwang nalang sila dili pa gyud maimpas.

Ang uban kanila nagpaputol nalang sa ilang koneksyon tungod sa kadako sa bayranan. 

“Refund sa naka bayad ug ibalik sa sakto nga bayranan. Dili ta mohunong hangtod mo refund ang Veco ug makorihian ang mga anomalya sa sistema sa bayrunon,” matud pa ni Ligas.