Masuso namatay human bakunahi

Contributed Photo

GINIKINAN sa masuso mitumbok nga ang pagbakuna sa ilang anak mao ang hinungdan sa kamatayon niini.

Ang mag-partner nga si Crisela Tuniacao ug Johnnel Abello nagtuo nga wala matarong og bakuna ang ilang anak sa usa ka nurse sa Eversley Child Sanitarium. Matud pa nila, niadtong Desyembre 4 ilang gidala ilang usa ka buwan nga anak para bakunahan og PCV 3 ug mahatagan sa iyang oral polio.

Dungag pa nila, sa dihang bakunahan na ang ilang anak, nagsige og tuplok ang nurse sa iyang cellphone ug wala butangi og alcohol ang panit sa bata una pa kini turukan sa bakuna.

Sa dihang nanguli na sila, matud pa ni Tuniacao nagsige na og hilak ang ilang anak. Ila kining gipainum og paracetamol ug matud pa nila, niarang-arang ang pamati niini. Apan matud pa ni Abella, sa dihang nangatug na sila anang gabhiona, nakugang siya sa syagit sa iyang partner kay nagkadugo ang ilong sa bata.

Aning higayona naglisud na og ginhawa ang masuso hinungdan nga gidagan na nila sa ospital. Didto gitabang ang bata ug wala madugay nakabsan kini sa kinabuhi.

Miangkon ang magtiayon nga adunay ubo ang ilang anak pipila ka adlaw sa wala pa kini bakunahi apan gipainum na nila kini og tambal nga giresita sa doktor. Matud pa nila, wala na kiniy gibati sa dihang ila kining gidala sa Eversley para pabakunahan.

Gihimakak sa pamunuan sa Eversley nga adunay pagkuwang sa ilang bahin tungod kay ang nurse nga mibakuna sa bata, dugay na sa iyang trabaho. 

Wala ma-autopsy ang patay’ng lawas sa masuso.