Mga Biktima ni Boy Laway mokiha

DISIDO ang mga biktima ni Jayson John Tapales alyas "Boy Laway" nga mopasaka og kriminal nga kaso batok kaniya tungod sa pagpamahid og pintal nga adunay laway niadtong Domingo, panahon sa Sinulog.

Ang mga biktima, nga wala magpaila, miatubang sa mga otoridad ug media ganiha, Martes, para ipadayag ang ilang gibati kabahin sa nahitabo.

Matud pa sa usa ka biktima nga lalaki, iyang mga kaila ang mi-chat kaniya sa Facebook Messenger aron ipahibalo kaniya nga usa siya sa gipahiran og pintal nga naay laway ni Tapales. Gipangutana sa media kung unsay buhaton sa biktima kung mangayo og pasaylo ang suspek, matud pa niya, dawaton kini niya apan padayun ang kaso.

"Lahi sad na pero mopasaka sad mig kaso," matud pa sa lalaki nga biktima.

Laing biktima ang nanawagan sa ubang mga biktima sa pagduyog kanila para mausa ang ilang reklamo batok kang Tapales. Base sa mga comments sa Facebook, dili lang si Tapales ang nagbuhat og hinanggaw niadtong Sinulog. Adunay mga babaye nga mireklamo nga gikuotan sa ilang dughan samtang nanuroy taliwala sa kabaga sa katawhan. 

Sa laing bahin, wala pa gihapon balita sa habig ni Tapales. Iyang Facebook account deactivated na kun gitangtang na kini human nahimong viral ang video diin makita siya nga namahid sa iyang laway sa mga tawo.

Si Tapales nga nangluwa sa pintal