AMORES MIHIMAKAK SA PASANGIL NI AHONG

LAPU-LAPU CITY Councilor Rico Amores mihimakak sa pasangil ni Mayor Ahong Chan nga nanghagit siya’g gubat sa mayor.

“Sa issue nga nanghagit kuno kog gubat sa mayor, dili intawn ni tinuod,” matud pa ni Amores sa iyang FB live. 

Sa iyang Facebook post gahapon, si Chan nangkanayon nga gisultian siya sa usa ka konsehal nga miingun si Amores nga “gubat na kini”. 

Apan hugot kining gihimakak sa konsehal, matud pa niya, konsehal ra siya, wa siyay gahum nga gubaton ang mayor. Wala sab siyay plano nga buhaton kini bisan og kontra-partido pa sila kay amigo sila. 

“Aron masayud ang tanan, ang akong mga tawo ang casualty sa gubat ni Mayor Chan. Kay gitaktak silang tanan. Karon lang gyud ko motingog ani. Wala gyud mo kadungog nako diri sa FB or sa akong programa sa radyo nga nagyawyaw sa gibuhat sa mayor. Nganu? Kay dili ko gusto og gubot. Kinsa man kong makiggubat sa mayor nga konsehal ra man ko, wala man koy executive power sama niya,” matud pa ni Amores.

Dungag pa sa konsehal nga unta sa kada pangutana ni Chan nga “Nakapaniudto na ba ang tanan?” nahinumdum kini nga adunay 11 ka mga empleyado nga iyang gikulban og kaldero.

Apan giklaro ni Amores nga wala siya masuko sa gibuhat ni Chan kay, niya pa, iya kining desisyon isip mayor sa dakbayan. Ang hangyo lang niya nga dili siya sigeg dauton sa mayor. Sa mga milabay’ng mga adlaw kanunay ma-starring ang ngan ni Amores sa Facebook ni Chan nga adunay dul-an ka 500,000 ka mga followers. Sa usa niya ka post gipasanginlan ni Chan nga gibabagan ni Amores ang pagpalit og mga air-conditioning unit alang sa Lapu-Lapu City Hospital. Gihimak kini ni Amores. Matud pa niya, gi-defer lang ang pagpasar sa maong request tungod kay buot sa chairman sa Committee on Finance nga si Konsehal Bobit Hiyas, pangutan-on una ang mga kadagkoan sa ospital sa dili pa kini ipapasar. Niya pa, giimbita na ang hospital administrator ug uban pa para tubagon ang mga pangutana sa konseho. 

“Dili ba sakto man ni? Katungod sa mga konsehal nga tukion ang mga proyekto sa dakbayan para masigurado nga dili ta ma-COA. Isip representate sa katawhan, mao man kini trabaho sa konseho, ang mobukiki sa mga purchase order, mga programa nga iduso sa executive. Kay kwarta sa katawhan ang atong gastuon,” matud pa ni Amores.

Unang termino karon ni Chan og base sa annual audit sa Commission on Audit sa miaging tuig sa financial statement sa Lapu-Lapu, ang dakbayan mipalit og mga supplies alang sa Covid-19 isolation facilities ngadto sa Heritage Muebles Mirable Export, Inc., usa ka shellcraft exporter. P4.9 million ang gibayad sa dakbayan sa maong kompanya nga karon gikwestyon na sa COA. 

Ang dakbayan mipalit usab sa Heritage og 2,000 ka kahon nga non-food relief items para sa disaster victims nga mikantidad og P7 million, matud pa sa COA. Dugang pa sa COA, sa duha ka purchase order, walay notice of award ug kuwang ang mga dokumento sa maong transaction.